ភ្នំពេញ៖ ស្ថានទូតអូស្ត្រាលីប្រចាំនៅកម្ពុជាបានឲ្យដឹងថា តាមរយៈ Action Aid Cambodia និងកម្មវិធី ANCP អូស្ត្រាលីមានមោទនភាពក្នុងការគាំទ្របណ្តាញស្ត្រីឆ្នើម ក្នុងការដោះស្រាយការងារសំខាន់ៗមួយចំនួនដែលបណ្ដាលមកពីការប្រែប្រួលអាកាសធាតុ និងបញ្ហាដទៃទៀតដែលស្ត្រីនិងក្មេងស្រីត្រូវប្រឈមក្នុងដំណាក់កាលជំងឺកូវីដ-១៩។

ស្ថានទូតអូស្ត្រាលីប្រចាំនៅកម្ពុជានៅថ្ងៃទី១៨ ខែមេសា ឆ្នាំ២០២២ បានឲ្យដឹងថាស្ត្រី និងក្មេងស្រីត្រូវបានរងផលប៉ះពាល់ជាខ្លាំងពីការប្រែប្រួលអាកាសធាតុ និងគ្រោះមហន្តរាយផ្សេងៗទៀត រួមទាំងបញ្ហាប្រឈមផ្នែកសេដ្ឋកិច្ចបណ្តាលមកពីការរាតត្បាតនៃជំងឺកូវីដ-១៩។ ជាមួយគ្នានេះ ស្ត្រីមានហានិភ័យខ្ពស់ក្នុងការធ្លាក់ចូលទៅក្នុងភាពក្រីក្រ ហើយទទួលរងបន្ទុករបស់គ្រួសារ និងតួនាទីជាអ្នកមើលថែទាំកាន់តែច្រើន។

បណ្តាញស្ត្រីឆ្នើមជំរុញឱ្យមានការចូលរួមពីស្ត្រីនៅក្នុងសហគមន៍តាមខេត្ត នៅក្នុងដំណើរការធ្វើការសម្រេចចិត្តទាក់ទងនឹងអភិបាលកិច្ចអាកាសធាតុនៅថ្នាក់ជាតិ ថ្នាក់ក្រោមជាតិ និងមូលដ្ឋាន។

ស្ថានទូតបន្តថា៖ «វាមានសារៈសំខាន់ណាស់ដែលទស្សនៈផ្ទាល់ខ្លួនរបស់ស្ត្រីត្រូវបានឆ្លុះបញ្ចាំងនៅក្នុងអភិបាលកិច្ចអាកាសធាតុ និង គ្រោះមហន្តរាយ។ ក្នុងនោះ ការគាំទ្រនិងការផ្តល់សិទ្ធិអំណាចដល់ស្ត្រីក្នុងភាពជាអ្នកដឹកនាំ គឺមានសារៈសំខាន់ចំពោះគោលនយោបាយសហប្រតិបត្តិការអភិវឌ្ឍន៍ របស់ប្រទេសអូស្ត្រាលី រួមជាមួយនឹងសកម្មភាពអាកាសធាតុ»។

កម្មវិធីជម្រើសដឹកនាំដោយស្រ្តីដើម្បីបន្សុំាទៅនឹងការប្រែប្រួលអាកាសធាតុនៅប្រទេសកម្ពុជា (WLACC) របស់អង្គការ Action Aid គឺជាកម្មវិធីគាំទ្រដោយ National Disaster Management Commission ស្ថានទូតអង់គ្លេសប្រចាំកម្ពុជា និង UN Women ដែលបង្កើតឡើងដើម្បីគាំទ្រ បណ្តាញស្ត្រីឆ្នើមដើម្បីផ្តល់នូវដំណោះស្រាយដែលមានបរិយាបន្នយេនឌ័រ ទៅដល់ផលប៉ះពាល់នៃការប្រែប្រួលអាកាសធាតុ និងគ្រោះមហន្តរាយ៕